ՀԲԸՄ Հայաստանը հայտարարում է իր «Կին ձեռներեցներ» կրթական-դրամաշնորհային ծրագրի նոր խմբերի հավաքագրման մասին՝ նախատեսված ՀՀ-ում արտադրության և վերամշակման ոլորտում գործող բիզնեսների համար։
Ծրագրին կարող են մասնակցել կանայք, ովքեր ունեն առնվազն մեկ տարի գործող բիզնես հետևյալ ոլորտներում․
- թռչնապահություն և օժանդակող գործունեություն,
- մեղվապահություն և օժանդակող գործունեություն,
- ջերմոցային տնտեսություն,
- սննդի արդյունաբերություն (հրուշակեղեն, շոկոլադ, չիր, թեյ, պանիր, պահածոներ և այլն)
- ալկոհոլային և ոչ ալկոհոլային խմիչքների արտադրություն (գինի, գարեջուր, հյութեր և այլն),
- խաղերի, խաղալիքների արտադրություն,
- տեքստիլ և նորաձևություն (hագուստի, աքսեսուարների, անկողնային պարագաների և այլնի արտադրություն),
- ձեռագործ աշխատանքներ,
- պայուսակների, կոշիկների, դրամապանակների, գոտիների և այլ կաշվե/ոչ կաշվե իրերի արտադրություն,
- զարդերի արտադրություն,
- հիգիենայի և խնամքի միջոցների արտադրություն,
- կահույքի և աքսեսուարների, դեկորատիվ իրերի արտադրություն,
- գյուղատնտեսական մթերքների վերամշակում:
Ծրագրի շրջանակներում մասնակիցները հնարավորություն կստանան զարգացնել իրենց ձեռնարկատիրական գիտելիքներն ու հմտությունները, կսովորեն կատարել շուկայի գրագետ ուսումնասիրություն, մշակել շուկայավարման ռազմավարություն, կազմակերպել բիզնեսի և ֆինանսների կառավարումն ու հասկանալ մրցակցային առավելությունները: Ավելին, բոլոր մասնակիցները կստանան իրենց բիզնես ոլորտին հատուկ անհատական խորհրդատվություն, իսկ լավագույնները կկարողանան դիմել մինչև 2 000 000 ՀՀ դրամի չափով դրամաշնորհի:
Ծրագրին կարող են դիմել ՀՀ-ում բնակվող ձեռնարկատիրական գործունեությամբ զբաղվող կանայք, ովքեր.
- ունեն ՀՀ քաղաքացիություն,
- 18 և բարձր տարիքի են,
- ունեն գործող սեփական բիզնես,
- գրանցված բիզնեսի դեպքում փաստաթղթերով հանդիսանում են բիզնեսի օրինական սեփականատեր կամ համահիմնադիր,
- պատրաստ են կատարել առաջադրանքները սահմանված ժամկետներում, աշխատել ծանրաբեռնված աշխատանքային գրաֆիկով:
Ծրագրին չեն կարող մասնակցել.
- հասարակական կազմակերպություններ,
- բիզնես դասընթացավարներ և խորհրդատուներ,
- նույն անձինք մեկից ավելի բիզնես ծրագրերով,
- նույն բիզնես ծրագրի տարբեր ներկայացուցիչներ, վերավաճառողներ,
- նրանք, ովքեր չեն հանդիսանում բիզնեսի սեփականատեր և/կամ չունեն հիմնադրված բիզնեսում օրինական բաժնեմաս (գրանցված բիզնեսի դեպքում),
- նրանք, ովքեր օրենքով սահմանված կարգով ի պաշտոնե չեն կարող զբաղվել ձեռնարկատիրական գործունեությամբ, օրինակ՝ հանրային ծառայողներ,
- նրանք, ովքեր հաշվարկային հաշիվների վրա ունեն արգելանք դատական ակտերի հարկադիր կատարման ծառայության կողմից, քանի որ դրամաշնորհը տրամադրվում է միայն անկանխիկ տարբերակով։
Դիմելու ընթացակարգը.
- Դիմումներն անհրաժեշտ է լրացնել հայերեն և հայատառ:
- Այլ լեզուներով կամ այլ տառերով (օրինակ՝ կյուրեղագիր (кириллица) և/կամ լատինատառ) լրացրած դիմումները չեն դիտարկվելու:
- Դիտարկվում են միայն լիարժեք լրացված դիմումները (թերի հայտերը չեն դիտարկվում):
- Դասընթացի լեզուն հայերենն է:
- Դասընթացը տեղի կունենա Երևանում շաբաթական 2 անգամ աշխատանքային օրերին, ժամը՝ 10:30-15:30,
- Դիմումների ընդունման վերջնաժամկետ՝ սեպտեմբերի 10, ժամը 17:00:
- Դասընթացների սկիզբ՝ սեպտեմբերի 18:
- Ծրագրի մասնակցության հայտը կարող եք լրացնել այստեղ:
Հետադարձ կապ՝ agbuwe@agbu.am, +374 60 722 235, +374 60 722 237:
Աշխատանքային ժամեր’ 10:00-18:00 (երկուշաբթի — ուրբաթ):
