Ինչ չի կարելի հրապարակել սոցիալական ցանցերում

Բիզնեսները, հատկապես վերջին տարիներին, ակտիվորեն զարգացնում են իրենց սոցիալական ցանցերի էջերը՝ ունենալով պարզ գիտակցում․ որքան ակտիվ եք սոցիալական ցանցերում ու որքան ճիշտ եք ներկայացնում ձեր բրենդը, այնքան ունենում եք բարի համբավ ու ճանաչելիություն, հետևաբար՝ բարձր վաճառքներ։

Ձեռնարկատերերին, իրենց SMM մասնագետ/գործընկերները, վստահաբար խորհուրդ են տալիս ունենալ էջեր, որոնք կլինեն ներշնչող, պրոֆեսիոնալ ու հավատարիմ բրենդների արժեքներին, բայց որոշ ձեռնարկատերեր, հատկապես փոքր ու միջին ձեռներեցության ներկայացուցիչներ, չունենալով առանձնացված բյուջե մարքեթինգային թիմի համար, կարող են որոշել ինքնուրույն զբաղվել սոցիալական էջերի առաջխաղացմամբ՝ թույլ տալով երբեմն կոպիտ սխալներ։

Այսօրվա նյութում կանդրադառնանք նրան, թե ինչ չի կարելի հրապարակել սոցիալական ցանցերում ու կներկայացնենք, թե ո՞ր հրապարակներումը կարող են բացասաբար անդրադառնալ բիզնեսի իմիջի վրա։

Աշխատեք զերծ մնալ բացասական կամ վիճահարույց բովանդակություններից։ Դրանք կարող են լինել քաղաքական, կրոնական, ազգային զգայուն թեմաներով վիճահարույց հարցեր, մրցակիցների բացահայտ քննադատություն կամ նույնիսկ վիրավորանք։ Հավատացեք, ձեր հաճախորդին այնքան էլ չի հետաքրքրում, թե դուք քաղաքական որ ուժին կամ հոսանքին եք պատկանում կամ սատարում։

Հրապարակեք միայն որակյալ ու լավ մշակված լուսանկարներ։ Վատ լուսավորությամբ ոչ պրոֆեսիոնալ լուսանկարները կարող են բացասական ընկալվել հաճախորդների կողմից։ Նույնին կարող է հանգեցնել նաև ծանրաբեռնված տեքստերով հրապարակումներն ու բրենդինգին անհամապատասխան դիզայներական լուծումները։

Խուսափեք ոչ հստակ ինֆորմացիայից ու անճշտություններից։ Հրապարակելով սխալ գներ, ժամկետներ, հասցեներ կամ կապի դուրս գալու եղանակներ, միայն կխանգարեք ձեր բիզնեսի աճին։ Չափավոր եղեք նաև խոստումների հարցում։

Եթե ձեր հրապարակումները որևէ մեսիջ չեն պարունակում ջնջեք դրանք: Աշխատեք չհրապարակել կրկնվող բովանդակություն կամ օրական մի քանի անգամ հրապարակումներով փորձել «ազդել» մարդկանց վրա։ Նման պարագայում ձեր հետևորդների թիվն աճելու փոխարեն կնվազի։

Հումորային հրապարակումներ տեղադրելիս նույնպես աչալուրջ եղեք, եթե այն չի համապատասխանում ձեր ոճին կարող է սխալ ընկալվել։

Միացե՛ք մեր տելեգրամյան ալիքին։

Հրապարակումներ անելուց առաջ միշտ ստուգեք՝

Արդյո՞ք տեքստն առանց ուղղագրական ու շարահյուսական սխալների է, լուսանկարները կամ տեսանյութերը բարձրորա՞կ են, թե՞ ոչ, բովանդակությունն արդյո՞ք համապատասխանում է բրենդի ոճին ու ներկայացված տվյալներն հավաստի՞ են, թե՞ ոչ։

Ընդհանրապես, հաճախորդների հետ կապը պահելու համար պատասխանեք մեկնաբանություններին, մի՛ անտեսեք ոչ մի նամակ։ Արձագանքեք դրանց հնարավորինս արագ։ Շնորհակալություն հայտնեք հաճախորդներից դրական արձագանքի համար, իսկ քննադատությունն ընդունեք որպես աճի ու սխալները շտկելու հնարավորություն, ոչ թե թշնամություն։

Թիրախավորված աշխատելու համար ամսվա կտրվածքով ունեցեք կոնտենտ պլան, յուրաքանչյուր հրապարակման համար հստակ նպատակներ սահմանեք ու առաջնորդվեք դրանով։ Այդ հրապարակումն օգնելո՞ւ է վաճառքների աճին, հաճախորդների ներգրավմանը, վստահության բարձրացմանը, թե՞ զուտ տեղեկատվական է։

Օգտագործեք սոցիալական ցանցերի ողջ հնարավորությունը։ Օրինակ, ինստագրամում ակտիվացրեք սթորի ու ռիլս բաժինները։

Միջազգային հեղինակավոր մի շարք ընկերություններ սխալ հրապարակումներ տեղադրելով՝ «արժեզրկել են» իրենց բիզնեսները։ Այսպես, օրինակ Burger King-ը 2021 թվականին, դեռ այն ժամանակվա թվիթերում (այժմյան իքսում) տեղադրում են հրապարկում, այն վերնագրելով՝ «Women belong in the kitchen»։ Շատերն այն ընունեցին զուտ սեքսիստական հրապարակում, քանզի գրառումը կարճ էր ու առանց բացատրության։ Ընկերությունն իրականում ուզում էր աջակցել կին խոհարարներին, բայց հազարավոր բացասական արձագանքներից հետո ուղղակի ստիպված եղան հեռացնել գրառումը։

Dove-ն էլ իր 2017-ին հրապարակած «Before & After» գովազդի պատճառով «ընկավ» պատմությունների մեջ։ Սևամորթ կինը փոխարկվում էր սպիտակամորթով, իսկ ապրանքանիշը ներկայացված էր «մաքրության» համատեքստում, բայց այն ընկալվեց որպես ռասիստական, իսկ ընկերության համբավը վնասվեց։ Ռասիստական ընկալվեց նաև հանրահայտ H&M – «Coolest Monkey in the Jungle» հագուստի գովազդը, որը հրապարակվեց 2018 թվականին։ Հագուստի գովազդում սևամորթ երեխային հագցրել էին «Coolest Monkey in the Jungle» շապիկը։ Անզգույշ քայլն ընկալվեց որպես ռասիստական ու որոշ երկրներում սկսվեցին հարձակումներ բրենդի խանութների վրա։ Ի՞նչ «շահեց» H&M-ը՝ բողոքի հսկայական ալիք ու հեղինակության վնաս։

Խնդրի կարող է հանգեցնել նույնիսկ սխալ հեշթեգների օգտագործումը։ 13 տարի առաջ McDonalds ընկերությունը սկսեց արշավ՝ օգտագործելով McDStories հեշթեգը: Արշավի նպատակն այն էր, որ հաճախորդները կիսվեն իրենց դրական էմոցիաներով, բայց հաճախորդները սկսեցին կիսվել հակառակ էմոցիաներով ու արագ սննդի կետերից օգտվելու բացասական փորձերով։ Արդյունքում, հեշթեգը դադարեցվեց օգտագործվել։

Հիշեք հետևյալը․ սոցիալական ցանցերը մեծ, շատ մեծ դեր են խաղում յուրաքանչյուրիս առօրյայում և եթե ձեր թիրախային սեգմենտը հենց այստեղ է, նրանց պետք է մատուցեք հրապարակումներ, որոնք մանրամասնորեն մշակված են ու անթերի։

Միացե՛ք մեր տելեգրամյան ալիքին։