Ինչպես տեղեկացնում է Արմինֆոն՝ հղում կատարելով Հայաստանի Հանրապետության վիճակագրական կոմիտեին՝
Հայաստանում 2022թ. առաջին կիսամյակում ծառայությունների ոլորտի աճը կտրուկ արագացել է 2,7 տոկոսից մինչև 26,9 %, ինչի արդյունքում ծավալը գերազանցել է 1.1 տրլն դրամը (2.4 մլրդ դոլար): Հունիս ամսվա ընթացքում մատուցված ծառայությունների ծավալն աճել է 8% — ով (մեկ տարի առաջ 3.9% — ի դիմաց)՝ կազմելով 226.7 մլրդ դրամ ($536.4 մլն)։
Տարեկան աճի նման թռիչք են հրահրել, հիմնականում, մատուցվող ծառայությունների ծավալն զգալիորեն ավելացրած ավիաուղիները, հյուրանոցները, բանկերը, վարձակալության և լիզինգի հատվածները: Մնացած գրեթե բոլոր ոլորտներում ևս աճ է արձանագրվել, բայց՝ համեմատաբար համեստ։
Մասնավորապես, ավիաուղիների կողմից մատուցված ծառայությունների ծավալը աճել է 2,6 անգամ, հյուրանոցներինը՝ 64,5 %-ով, բանկերինը՝ 52,7 %-ով, վարձակալության և լիզինգի հատվածներինը՝ 51,3 %-ով: ՏՏ ոլորտի մատուցած ծառայությունների ծավալն ավելացել է 51.9% — ով: Զբոսաշրջային ֆիրմաներն ու տուրօպերատորները մատուցված ծառայությունների ծավալն ավելացրել են 34,2 %-ով, նույնքան աճել է ծառայությունների ծավալը սպորտի, ժամանցի և հանգստի ոլորտներում, ծառայությունների փոքր-ինչ պակաս աճ են արձանագրում բարերն և հասարակական սննդի համանման այլ հաստատությունները՝ 31,1 %-ով, իսկ խաղատները, որոնք աչքի չեն ընկնում ծառայությունների մեծ ծավալով, դրանք ավելացրել են 70,5 %-ով: Ապահովագրական հատվածը ծառայությունների ծավալն ավելացրել է 32,6 %-ով։
Տրամադրված ծառայությունների ծավալով առաջատար է ֆինանսական հատվածը’ 30.1% կամ 341.7 մլրդ դրամ, որից 270.1 մլրդ դրամը ապահովում են բանկերը: Երկրորդ տեղում տեղեկատվության և կապի ոլորտն է՝ 193.3 մլրդ դրամ (17.1%), ընդ որում, հիմնական ծավալը բաժին է ընկնում հեռահաղորդակցության հատվածին (114.3 մլրդ)։ Ծառայությունների ծավալով երրորդ տեղում է տրանսպորտի ոլորտը՝ 133.4 մլրդ դրամ (11.8%) ։ Չորրորդ տեղում է մշակույթի, ժամանցի և հանգստի ոլորտը՝ 125.3 մլրդ դրամ (ընդհանուր ծավալի 11.1% — ը)։ Մատուցված ծառայությունների ծավալով առաջատարների հնգյակը եզրափակում է հանրային սննդի և զբոսաշրջության ոլորտը ՝ 102.2 մլրդ դրամ (9%):
Իսկ ծառայությունների աճի առումով առաջատար ոլորտների ծավալներն անհամեմատ ավելի քիչ են. հյուրանոցային բիզնես՝ 20.2 մլրդ, ավիաուղիներ՝ 15.6 մլրդ, վարձակալության և լիզինգի հատված՝ 3.6 մլրդ. Ինչ վերաբերում է բանկերին, ապա դրանք առաջատար են ինչպես մատուցված ծառայությունների ծավալով, այնպես էլ դրանց աճի տեմպերով:
