Նախորդ նյութում հասցրեցինք ձեզ մակերեսորեն ծանոթացնել մարքեթինգի հետ։ Խոսեցինք մարքեթինգի առաջացման, տերմինի նշանակության, զարգացման էվոլուցիայի, ֆունկցիաների, նպատակների, խնդիրների, հայեցակարգերի և հետազոտությունների մասին։
Մարքեթինգին նվիրված նյութի 2-րդ մասում խոսեցինք 5 հաջողված մարքեթինգային օրինակների մասին։ Այսօր ցանկանում ենք ներկայացնել 5 օրինակ ևս։
1․ Coca Cola
Coca Cola-ի մարքեթինգային քայլերը բազմազան են և դա ներկայացնել ինչ-որ ենթավերնագրի տակ կլինի սխալ, սակայն կաշխատենք բերել հաջողված գործիքների օրինակներից մի քանիսը։
Հիշու՞մ եք Coca Cola-ի «տոներն են մոտենում» հոլովակը։ Սա հաջողված տասնյակ օրինակներից միայն մեկն է։ Ըմպելիք արտադրող ընկերության մարքեթինգային բաժնի պատասխանատուներն անընդհատ գերազանցում են իրենց՝ օգտագործելով նոր տարրեր և սոցիալական հարթակներ, ներգրավելով՝ աշխատանքային նոր գործիքներ և գործընկերներ հրավիրելով աշխարհի 80 երկրներից։
Այսպիսի լուրջ և մանրակրկիտ աշխատանքն, իհարկե, չէր կարող անհետևանք մնալ։
Թիմն իր մարքեթինգային հզոր քայլերով կարողացավ փոխել երիտասարդների (նրանք համարվում են հիմանական սպառողը) մտածելակերպը, ովքեր համարում էին, որ գազավորված այս ըմպելիքն արդեն հնաոճ է։ Coca Cola-ն կարողացավ այն դարձնել երիտասարդների նորաոճ երևալու բանաձևերից մեկը։
Ղեկավարները, մարքեթոլոգները, իրավաբանները, դիզայններները, մենեջերները ներգրավված էին մի շարք հարցերում՝ պիտակի գույնի ընտրությունից՝ մինչև բառերի ընտրություն, որոնք չէր կարելի օգտագործել բրենդի հետ։ Բրենդի համար ստեղծվել է նոր տառատեսակ։ Թվերն ավելի կօգնեն մեզ՝
- 150 հայտ՝ մարքեթինգային համաձայնությունների հասնելու համար
- 25 հանդիպում՝ ռիսկերի գնահատման և քննարկման համար
- 4000 ժամ բանակցություններ՝ հետաքրքրված անձանց հետ
- 225 հետաքննություն՝ շուկայական նշանի իրավազորությունը պարզելու համար
- 40 ժամ՝ կարմրի ճիշտ երանգի ընտրության
- 2302 նոր՝ գեղարվեստական նկարներ
- 303669 վաճառքի կետ
- 5287 բառ, որոնք չի կարելի օգտագործել պիտակի վրա
Ահա այսպես, մանրազննին ուսումնասիրությունների, քննարկումների և հետաքննությունների արդյունքում Coca Cola-ն հասավ իր նպատակին։
2․ Apple
Apple-ի համահիմնադիր Սթիվ Ջոբսը ոգևորված էր NIke-ի մարքեթինգային և գովազդային ռազմավարությունից։ Այնտեղ հստակ նշվում էր, որ խոսվելու է ոչ թե ապրանքի մասին, այլ մարդկանց, որոնք իրենց արտադրանքի շնորհիվ կարողացել են հասնել բարձունքների։
Նույն կերպ վարվեց նաև Ջոբսը։ Մարքեթոլոգները այլևս չէին ցանկանում համոզել, որ Apple-ը «երկաթե մեքենա» է, որն օգնում է աշխատել։ Ընկերության հիմնական արժեքը դարձան մարդիկ։ «Մենք հավատում ենք, որ մարդիկ կարող են փոխել աշխարհը դեպի լավը», — ասում էր ղեկավարը։
Ավելի ուշ, Apple-ն ունեցավ նոր կարգախոս՝ «Մտածիր այլ կերպ»։ Ընկերության գովազդում իրենց մասնակցությունն ունեին Մուհամմեդ Ալին, Ջոն Լենոնը, Մարտին Լյութեր Քինգը, Մահաթմա Գանդին։ Եվ դա օգնեց ընկերությանը։
Սթիվ Ջոբսը մտածում էր, որ ինֆորմացիոն այս դարաշրջանում հնարավոր չէ հիշել ընկերության մասին, այդ պատճառով պետք էր մարդկանց հասցնել արժեքները, այլ ոչ թե ապրանքի առավելությունները։ Apple-ը բացատրում էր իր գովազդն այսպես՝ «Մենք ուզում ենք փոխել աշխարհը, այդ պատճառով գովազդում այնպիսի մարդիկ են, որոնց դա հաջողվել է»։
Մեկ կարևոր քայլ ևս։ Ջոբսը, երբ ներկայացնում էր նոր iPad-ը՝ հանրության առաջ ասեց՝ «Գիտնականներն ու մարքեթոլոգները մտածում էին, որ iPad-ը պետք է արժենա հազարավոր դոլարներ»։ Այս խոսքից հետո Ջոբսի թիկունքում գտնվող էկրանի վրա հայտնվեց 999 թիվը։
Նա շարունակեց իր խոսքը և մի քանի րոպե անց, երբ ավարտեց այն, ասաց՝ «Իրականում, iPad-ի արժեքը կազմելու է 499 դոլար»։ Դահլիճում գտնվողներն արդեն ենթագիտակցաբար մտածում էին, որ ստացել են 50 % զեղչ՝ Apple-ի նոր արտադրանքի համար։
3․ Heineken
Եթե ֆուտբոլի սիրահար եք, ապա գոնե մեկ անգամ դիտած կլինեք Չեմպիոնների լիգայի որևէ հանդիպում, իսկ եթե դիտել եք այն, ապա վստահաբար լսած կլինեք Heineken անվանումը։ Գարեջուր արտադրող այս ընկերության նպատակը թիրախային գովազդն է, ինչը փայլուն է ստացվում մարքեթինգային բաժնի ղեկավարների մոտ։
Բացի Չեմպիոնների լիգան, Heineken-ը հովանավորում է մի շարք սպորտային և ոչ սպորտային միջոցառումներ ևս՝ Formula 1, Ֆուտբոլի Եվրոպայի առաջնություններ (թե՛ տղամարդկանց, թե՛ կանանց) և այլն։
Գարեջուր արտադրող ընկերության կարգախոսն է՝ երբեք մի դիտիր միայնակ։
Այսպիսով, Heineken-ը շեշտը դնում է թիրախային ճիշտ լսարանի վրա և ավելացնում վաճառքներն ու ամրապնդում բրենդի իմիջը։
4․ Netflix
Netflix-ը վճարովի ծառայություններ է մատուցում աշխարհի ավելի քան 100 երկրում։ Ընկերության թվային մարքեթինգը ներառում է տարատեսակ արշավներ և հրապարակումներ սոցիալական ցանցերում։
Netflix-ը հնարավորություն է տալիս դիտել ցանկացած ֆիլմ (և ոչ միայն), ցանկացած պահի, ցանկացած վայրում, ցանկացած սարքավորման միջոցով՝ համացանցի հասանելիության միջոցով։
Նման ընկերությունների մարքեթինգային քայլերի գլխավոր նպատակը ուշադրության կենտրոնացնում է, այդպիսով նոր հետևորդներ բերելը։
Netflix-ն առանձնահատուկ մարքեթինգային լուրջ գործիքներ չի կիրառում, սակայն միշտ հայտնվում է ճիշտ պահին՝ ճիշտ տեղում։
5. Volkswagen Group
1937 թվականին հիմնադրված Volkswagen Group-ը Եվրոպայի խոշորագույն ավտոարտադրողն է, որն աշխատում է 12 ապրանքանիշերի վրա։ Դրանք են՝ ինչպիսիք են Audi, Seat, Skoda, Bentley, Porshe, Lamborghini, Scania, Ducati, Man, Bugatti, Volkswagen և Volkswagen կոմերցիոն մեքենաներ:
Այս ընկերության մարքեթինգային կարևոր քայլերինց են տարբերակված թիրախային ռազմավարությունը, որն իրենից ներկայացնում է ապրանքանիշի ճիշտ դասավորությունը ինչպես իր մտքում պատկերացնում է պոտենցիալ հաճախորդը։ Շուկայում ճիշտ դիրքավորումն օգնում է ստեղծել հուզական և ոգեշնչող կապ հաճախորդների հետ։
Volkswagen-ի մարքեթինգային ռազմավարությունն օգնում է ապրանքանիշին և ընկերությանը մրցունակ տեղ զբաղեցնել շուկայում և հասնել իր բիզնես նպատակներին և խնդիրներին:
Այսպիսով, կարող ենք հետևություններ անել, որ մանրակրկիտ աշխատանքն ու մանրազննին ուսումնասիրությունը, ճիշտ ներկայացումը և «խարիսխի» գործոնը (որը կիրառեց Ջոբսը՝ iPad-ի ներկայացման ժամանակ), թիրախային ճիշտ շուկան, կապերը, ճիշտ պահին ճիշտ տեղում հայտնվելն ու նույնիսկ ապրանքի ճիշտ դասավորությունը մեծ նշանակություն ունեն։ Մարքեթինգային ճիշտ քայլերը կօգնեն ձեզ ցանկացած հարցում։
